大公網2月16日訊（記者龔學鳴）：特首選舉參選人林鄭月娥前排推出初步政綱，係教育方面着墨較多。職訓局（VTC）主席陳鎮仁（Clement）透露，今年施政報告宣布向職訓局撥出茶果嶺地皮興建現代化校舍，時任政務司司長嘅林太都有幫手。Clement話，之前有搵過教育局同其他部門傾覓地起校舍嘅事，但政府內部就將個波踢嚟踢去，一直無進展，最後都係直接搵林太，靠佢督促部門做好呢件事。Clement指，林太做司長個陣，都好支持VTC嘅工作，聽講佢去過新加坡考察，睇到當地職業教育嘅發展，覺得香港都有需要係呢方面加強。
Clement本身都係工業界（第一）選委，上屆特首選舉，工總全數18票提名唐英年，今屆就無捆綁提名。Clement就話，特首梁振英上任後，都很支持工總，工總與政府嘅關係都好好，佢自己就未決定支持邊個參選人，最終會投畀邊個，就要視乎邊個嘅政網承諾支持職專培訓。
