圖：民建聯帶埋財神喺觀塘同黃大仙巡區\大公報記者 林少權攝
民建聯主席李慧琼（Starry）尋日拍住立法會議員柯創盛（柯仔），連同民記觀塘支部同黃大仙支部成員，帶埋財神一齊喺觀塘和黃大仙巡區。佢哋上晝行觀塘嘅公共屋邨、屋苑，下晝密鑼緊鼓去黃大仙嘅街頭及街市，同九龍東嘅各位街坊拜年。
爭取聖母醫院夜診
Starry喺活動開始前話，柯創盛一向都好關心九龍東嘅公共設施不足，民建聯除咗同大家拜年，仲時常將市民關心嘅議題放喺心上。Starry又提到民建聯早前提出對新特首嘅期望，希望各位參選人可以積極回應。
柯仔接過咪後，就話明白大家關心特首選舉，佢呼籲特首參選人落區睇嚇，希望佢地可以更加貼地，掌握民情嘅重要，特別應該關心嚇九龍東嘅安老同交通問題，佢哋會為居民爭取聖母醫院夜診服務。尋日係大年初六，柯仔又祝香港人六六大順、身體健康，香港繼續繁榮穩定。
民記一行人之後就先去安達邨嘅茶樓，又同財神去到雜貨舖，黃大仙大成街市同大家拜年，將上上籤送畀大家！好似Starry話齋：「新年最開心做咩？梗係同大家拜年啦！」
