戴耀廷仍未找數。大公報記者龔學鳴攝

　　大公網11月10日訊（記者龔學鳴）參選行政長官選舉委員會，原本係為咗代表市民選出有能力、有擔當嘅下一任特首，但而家好多反對派卻係意氣用事，為反而反，好似「佔中三丑」中嘅戴耀廷同陳健文，尋日就聯同多名大專院校講師去政府總部，報名參選選委會高教界。陳健文仲講到明，參選就係唔希望特首梁振英連任。而戴耀廷就更不知所雲，竟然話參選係為咗維護香港嘅法治。

　　戴耀廷同陳健文，尋日就聯同多名大專院校講師去政府總部報名參選選委會高教界。大公報記者龔學鳴攝

　　嚇？無聽錯啊嘛？兩年前策動咗長達79日嘅非法「佔中」，其中發生多起暴力衝擊，開啟呢兩年旺角暴動、鳩嗚、佔西等一系列損害法治嘅戴耀廷，居然有臉提「法治」呢兩個字？唔單止係咁，之前操盤「雷動」搞到「泛民」布局天翻地覆，戴耀廷今次仲唸住「協調各界」，令最終有超過300人當選選委咁話。

　　唉，舊賬都未清，又想搞新嘢？講起舊賬，戴耀廷「佔中」個陣實牙實齒話會公布佔中賬目，但事情過咗近兩年，每一次被問起都話「正在做緊」、「最快下一個月」，今次亦唔例外，都喺話「會盡快安排」，真係聽都聽到厭。如果盤數真係無問題嘅，唔該戴教授找咗條數先啦。