楊岳橋整蠱電話騙徒，有網民覺得無聊。網上截圖
大公網11月3日訊（記者 龔學鳴）電話騙案無日無之，假扮內地政府人員嘅騙徒，會隨機打俾市民，睇下有冇「水魚」上釣，氹佢哋匯款返內地，而最近就有個騙徒打咗俾公民黨署理黨魁楊岳橋（岳少）。岳少一收到騙徒打嚟，好似如獲至寶咁，即刻叫身邊嘅資訊科技界立法會議員莫乃光幫手拍片，事後仲將條片放上網，show嚇自己點樣爆住粗咁點到個騙徒「陀陀擰」。不過，有啲網民就覺得佢「無聊當有趣」。
片段顯示，岳少自稱自己係「梁振英」，之後騙徒就聲稱岳少有一封來自上海嘅郵件，岳少就玩返個騙徒轉頭，話自己等緊一封北京嘅信，愈講就愈眉飛色舞，仲爆粗鬧個騙徒「他媽的」、「通知個屁」添，最終個騙徒見唔多對路，就收線了事。玩咗四分鐘，岳少就哈哈大笑完場。
雖然網民反應普遍都係讚岳少好幽默、整蠱騙子大快人心，不過亦有人留言批評岳少「極度無聊，白支人工」；亦有人話岳少呢啲政客其實同騙徒無分別，「人哋係呃錢，佢係呃選票，一樣咁可恥」喎。其實鄭晴覺得，作為議員應該要有返議員嘅格，言行專業啲、成熟啲，市民先至會對你有信心，希望岳少做少啲呢啲幼稚嘢啦。
