王國興(左二)到廉署請願，要求廉政專員白韞六捉內鬼。大公報記者攝
大公網10月31日訊 今日係萬聖節，周街都係鬼，23萬監察嘅王國興、梁子穎、莫健榮亦專程去廉政公署捉鬼喎！到底興哥要捉乜鬼呢？興哥就話廉署有內鬼，因為今年7月民主黨林卓廷、何俊仁召開記者會，就李寶蘭離職、廉署人事變動、特首梁振英UGL事件發表評論，聲稱廉署內部「可靠消息來源」，指控廉署已經進入咗「黑暗年代」。興哥好勞氣咁話，呢件事真係令人十分震驚，一係林卓廷等人係虛構，一係廉署有內鬼。咁樣做簡直嚴重打擊廉署保密金漆招牌，因為「廉署保密，密密實實」，市民都願意挺身舉報。於是今日到廉署請願
興哥又話，泄露廉署調查內情係嚴重嘅刑事罪行，一經定罪最高可判入獄一年。廉署係紀律部隊，如果有人唔嚴格遵守規定，違反保密行事原則，不斷披露消息俾林卓廷等政界中人，又點可以保障到市民私隱同權益呢?點樣可以保證廉署調查嘅合法性、公正性呢? 興哥強調，希望廉政專員白韞六能夠掃除內鬼同埋無間道，確保廉署可以獨立、公正執法，絕對唔容許出現內鬼泄露任何消息喎。
