大公網9月15日訊（記者文軒）中秋佳節自然唔少得賞月、食月餅啦，但中秋節同月餅嘅來源又有幾多人知咧？民政事務局局長政治助理徐英偉今日就化身歷史老師，喺Facebook開堂授課，同大家介紹相關嘅歷史知識。
徐老師話，中秋一詞最早見於《周禮》，當中雖然有提到中秋拜月嘅活動，但就無講明喺八月邊一日，一直到隋朝末期大業十三年嘅八月十五日，當時唐軍將領裴寂以圓月作為構思，發明咗月餅，並廣發軍中作為軍餉，成功解決軍糧問題。到明清時期，中秋節已成為中國嘅一大傳統節日。
徐老師中介紹咗賞月嘅部分「專業術語」。他話根據《正德江寧縣誌》記載，合家賞月稱為「慶團圓」，團坐聚飲稱為「圓月」，出遊待市稱為「走月」。講咗咁多，大家喺賞月嘅時候，喺唔喺多咗一分歷史意蘊呢？
