攬炒派Cap水嘅方式層出不窮!有位自稱係「屠龍小隊」成員嘅網民「對空吟唱」，噚日喺「連登」發帖，講到自己同隊友好慘，呼籲黃絲課金畀佢哋。不過，一班「連登仔」就認為佢一啲證據都冇，擺明係呃錢，譏諷佢唔係「屠龍小隊」，係「屠深黃銀包」啫。
「對空吟唱」噚日以「屠龍想阻你一分鍾(鐘)」為題發帖，稱佢哋係「流亡海外既(嘅)屠龍小隊成員James，Edward同Chris……分別流亡於台灣、英國同澳洲。」然後，賣慘話「流亡」之後各自都忙於盡力適應及融入當地嘅生活，不過因為疫情同「其他問題」，令佢哋喺住屋同工作方面都開始出現問題喎，所以希望大家資助嚇佢哋生活開支、醫療開支、同埋日後龐大既學費咁話。睇埋佢哋眾籌嘅網頁，內容話去咗去澳洲的「Edward」患有先天眼疾要做手術，又話佢喺黑暴中俾橡膠子彈「擊中後腦」，網頁入面仲有疑似爆後腦嘅相㖭。
