特區政府努力覓地建屋，喺新界多個地方提出發展計劃，不過基本上都係由上而下咁諮詢社會意見，鮮見有地區組織主動提出規劃大綱而獲政府接納。民建聯立法會議員、元朗區議員梁志祥（祥哥）最近就有大計。佢同鄭晴透露，打算邀請前立法會建築、測量、都市規劃及園境界議員、思籌知路召集人謝偉銓（Tony）一齊合作，寫寫元朗區嘅發展規劃意見。
祥哥話，呢個建議獲得不少區議員支持，如果做得成功，會考慮以區議會嘅名義向政府提交，佢仲希望政府日後可以向區議會增撥資源，讓地區自行規劃發展，建立一套地區規劃嘅文化。祥哥又話，唔少新界人都憂慮收地賠償、安置及區內交通配套不足嘅問題，政府應該從善如流，多聽地區意見，推行發展計劃先更順暢。
