圖：遊走「罪惡之城」九龍城寨內的橫街窄巷，提防以厲鬼姿態再現的昔日黑幫、罪犯及黃綠醫生來襲

「乾坤一開，三七氣流一轉……」啱啱大步檻過「鬼節」，意味仲有一個月時間，海洋公園年度盛事哈囉喂全日祭即將開「鬼門關」。想知今年11個哈囉喂景點、12種獨特體驗有咩牛鬼蛇神出沒？嘩嘩！鄭晴尋日率先體驗其中三個，劇透過你知喇！

　　海洋公園哈囉喂今年新推嘅「城寨驚魂」，以昔日「三不管地帶」九龍城寨為場景主題。任職場景製作超過30年嘅魯德義話畀鄭晴知，今次鬼屋最特別係將樓高14呎嘅空間，打造成昔日嘅密集樓房。遊客沿狹窄小巷逐步走入，途中會聽見飛機引擎聲，抬頭睇嚇有無飛機準備降落啟德機場時，小心被嚇親！皆因城寨內嘅住客、黑道、妓女、怪醫等已化成厲鬼，流連舊式唐樓內，走入牙醫診所、妓院，隨時變成「下一個受害者」咁話！

　　慌宅主人 唧膿瘡當醬料食

　　採用中式元素嘅仲有「殭屍森塚」，夜幕低垂，走入古式廟宇，唔好亂行踩親骨灰龕，仲要提防中式殭屍來襲。「慌宅17」就有別於一般迷宮式鬼屋，裏面四間密室有唔同嘅恐懼體驗，要數最令人噁心嘅，一定係全身布滿膿瘡嘅慌宅主人，用佢身上唧出嘅膿瘡當醬料食，你又敢唔敢擺入口？

　　鄭晴尋日同一班行家率先體驗時，就算重複喺同一場景影相，一大班人都被嚇無數次。自問大膽嘅你，今年不妨入場試試。記住啦，海洋公園哈囉喂喺下月五日至三十一日期間、16個指定日子舉行。留意時辰，錯過咗就想去都無得去咯。