圖：「全民運動日2017」包括各式各樣康體活動
尋日係全民運動日，唔知各位有無跟住潮流做運動出返身汗呢？多位司局長就有啦，好似署理行政長官張建宗、民政事務局局長劉江華和康樂及文化事務署署長李美嫦，就一齊去咗沙田區圓洲角體育館跳返Part舞，你問我三個人跳咩舞？之唔係「毛巾操」囉！
草地滾球乒乓飛鏢樣樣有
張建宗同劉江華局長尋日一齊拎住條毛巾「手郁郁」、「腳印印」，跳到好似步操咁，非常盞鬼，佢地之後亦都有同小學生一齊玩室內草地滾球活動，李美嫦署長仲有姿態有實際，掟得非常好添！此外，創新及科技局局長楊偉雄、勞工及福利局局長羅致光、公務員事務局局長羅智光、保安局局長李家超、運輸及房屋局局長陳帆、教育局局長楊潤雄亦有去到不同地區出席全民運動日活動。好似李sir就去咗九龍公園玩掟飛鏢；而羅智光局長亦有同班同事打乒乓波。
至於楊偉雄局長就喺北河街體育館，即席參與迷你網球同樂活動，以球會友。之後佢仲去咗「連登仔」聖地黃金電腦商場和高登電腦中心，了解下商戶經營情況，仲話自己成日都行電腦商場㗎，最喜歡落手砌機，由386、486至Pentium電腦都自行組裝過。
