舊年港大發生校務委員會遭圍堵事件，港大學生會前會長馮敬恩被控刑事毀壞、刑事恐嚇與公眾地方行為不檢等多項控罪，法庭今日將作出裁決。馮敬恩近日喺社交網站撰文，話相信自己會留案底，恐怕做中學老師嘅夢想將要破碎。佢又自傷自憐咁話，司法程序令佢心力交瘁，每一日都係折磨，好似末期癌症病人咁，每日為自己嘅生命倒數。佢計劃，港大畢業後會到台大讀政治研究所，可見嘅將來都不會高度參與香港嘅本地政治，極其量只會撰寫評論，不會投身任何政治組織。
呢個世界無後悔藥食，馮同學身為港大學子，可謂天之驕子，但佢不務學業，為政治目的，不擇手段，當時身為校委會成員嘅佢違反保密協議，將會議內容斷章取義地外泄，甚至煽動同學衝擊校委會，今時今日搞到如斯田地，鄭晴覺得，佢仲可以怪誰呢？要怪就怪自己，廣大年輕學子，真係應該引以為戒呀。
