圖：九巴「楊過」本人原來係退休車長成哥\網上圖片
眾裏尋他千百度，驀然回首，那人卻在「巴士站欄杆處」！近日，一名身穿九巴制服嘅男士，憑一招「瞓欄杆」而受萬千網民敬仰，仲被封為九巴「楊過」。原來，九巴「楊過」真正身份係退休車長成哥。
成哥尋日喺九巴Facebook一段影片上現真身，佢透露自己未退休之前，就揸開巴士線98D，仲澄清自己學嘅係北少林，並非古墓派。雖然有圖有片，就應該有真相，但睇落成哥有個肚腩仔，頭上唔少白頭髮，要證明自己係九巴「楊過」本人，唔露番兩手，都未必有人信！豈料成哥示範時，前後唔使五秒，就已經使出絕學「瞓欄杆」之餘，仲耍多招少林十八嚮，真係老而彌堅！
講返正經先，成哥解畫指，其實當日只不過係同同事玩下，坑口北巴士總站其實有兩個車長休息室，平日當然會入去休息啦。邊位讀者想學嘢？簡單嘅，一係自己重播短片十次八次，鄭晴畀條link你睇先：https://www.facebook.com/kmbhongkong/videos/1397579986966767/，再唔係嘅，畀啲誠意去坑口北巴士司機休息室，敲門倒茶拜師學藝啦！
