陸頌雄拍下商戶於天耀街市結業時的落寞神情。
大公網5月11日訊 工聯會立法會議員陸頌雄(Michael)一向喜愛攝影,作為議員間中喺做地區工作同時,亦會順便影下相,更加曾經將自己嘅攝影作品交畀東華三院做宣傳品。唔講你未必知,原來陸頌雄曾經差啲成為攝影記者!
陸頌雄話,其實佢中學時間已經好鍾意攝影,更加去職培局上過堂學影相,所以當佢未有穩定工作嘅時候,曾經去面試應徵過攝影記者!佢記得當時同面試嘅人就住影相傾得相當投契,本來以為自己會被請,可惜最後無下文。
後來陸頌雄加入工聯會,成為區議員之後仲有喺工聯會義務教攝影班,就係咁樣認識咗後來嘅太太。作為一個攝影發燒友,陸頌雄到今日仍然以將來出一本自己嘅攝影集為目標,而家都有間中喺黨友搞嘅活動做下義務攝影師,儲嚇子彈架。