選舉事務處尋日公布特首候選人曾俊華（鬍鬚）嘅選舉開支申報，開支總數為1017萬，比成功當選的林鄭月娥總開支1200多萬元少。不過兩人喺廣告宣傳嘅費用差別都好大，林太只係用咗360幾萬元，佔開支只有三成；鬍鬚就用咗548萬宣傳，竟然佔選舉開支超過一半，睇嚟佢嘅「神級關公」都係要使唔少錢。
申報就顯示鬍鬚畀咗336萬元競選辦「創意及社交媒體部門」下嘅廣告公司Secret Tour，用喺品牌形象設計、標誌、主要視覺設計、宣傳片製作、競選團隊風褸、襟章製作等形象工程。
而花喺Facebook、YouTube同Instagram等社交媒體嘅錢更高達逾210萬元。
至於捐款方面，鬍鬚就收到1533萬元，當中四筆合共95萬元嘅捐款，來自「頭號薯粉」田北俊關連嘅企業。仲有前行會成員楊敏德、前立法會議員詹培忠各捐25萬元、香港電視主席王維基捐20萬元、合和董事總經理胡文新捐10萬元。
