「娘子呀，同牛魔王出嚟睇『戴妖』發噏風啦！」鄭晴忍唔住要借用下《大話西遊》嘅台詞，無錯，被網友恥笑為「戴妖」嘅「佔中」發起人戴耀廷，尋日又喺報章撰文，發起一個痴人說夢嘅「風雲計劃」。為咗可以操縱下屆特首選舉，戴耀廷話希望至少有300名「民主」人士願意花六年時間，參選2019年區議會選舉，喺18區各自組織非建制團隊，之後就喺港九各議會同新界區議會贏得105個及112個或以上民選議席，咁樣「泛民」就可以喺2022年選委會多取117席選委，達到500席以上喎！
鄭晴睇到呢度，真係笑咗。戴耀廷之前嘅「雷動計劃」，已經搞到唔少反對派怨聲載道。早前佢又搞所謂「特首民投」，導致大批選民嘅私隱外泄，「泛民」都費事睬佢。而家仲話咩「風雲計劃」？戴耀廷係咪睇得《風雲》太多，想做雄霸啊？咁佢知唔知雄霸有咩下場呢？
鄭晴
