▶講到玩水，小朋友當然最開心
大公報記者林良堅攝
得人恩果千年記，童年時曾接受國際培幼會援助嘅財政司司長陳茂波，尋日出席國際培幼會慈善跑步籌款活動，呼籲社會幫助發展中國家嘅女孩。佢又話，政府會加強家庭議會同兒童權利論壇嘅協作，繼續收集兒童意見，確保兒童對政府政策有發言權。
曾接受國際培幼會援助
國際培幼會主要幫助發展中國家嘅兒童，依家響香港設有捐助辦事處，但原來1959年至1973年間，香港都係該會嘅受助地區之一，逾萬人接受過援助，陳茂波都係受惠者之一。佢尋日出席該會活動致辭時就提到，自己作為國際培幼會嘅受助人，好感恩，但調查同實際情況所見，喺部分發展中地區，女孩不能享有同男孩相同嘅成長機會及資源，有人甚至不幸地被迫早婚、被販賣，面對暴力、剝削，甚至被侵犯，而幫助呢班弱勢女孩免受歧視、不平等及粗暴的對待，係文明社會應有之義。
陳茂波呼籲大家支持國際培幼會嘅籌款活動，幫助發展中國家嘅女孩，令佢哋感到自身嘅價值，有機會發揮潛能，為家庭和國家作出貢獻。
佢又提到，政府致力推動兒童權利，會就不同議題向關心兒童事務嘅人士諮詢同溝通，亦會加強家庭議會同兒童權利論壇嘅協作，包括向家庭議會轉達兒童在論壇上對政府各措施嘅意見，確保兒童對政策有發言權。政府自2006年推出「兒童權利教育活動資助計劃」至今，資助咗約300個非政府機構項目，加強兒童同公眾對兒童權益嘅認識。
