大公網3月27日訊（記者 龔學鳴）：林鄭月娥以777票高票當選第五屆行政長官，仲成為香港第一位女特首。唔少市民都對「777」呢個靚冧巴有唔同解讀，就連保險界立法會議員陳健波（波哥）都要拍片分享嚇自己嘅獨到見解。佢話，「三條七」令佢聯想到一種中藥喎，仲話係依家香港好需要添，究竟係咩嚟呢？
波哥話，自己對中醫好有興趣，「777」令佢聯想起中藥「三七」，即係一般人經常叫嘅「田七」。田七有散瘀、消腫、止痛嘅作用，有「止血不留瘀，化瘀不傷正」嘅特點。
咁田七同香港又有咩關係呢？波哥話，血流不暢就會有痛症，香港亦都一樣，現時積壓咗大量問題，社會撕裂等同「流血」，社會內耗就等同有「瘀血」。佢希望林太接任特首一職後，能夠好似田七咁，為香港止血散瘀，「打通香港嘅血脈，香港先至會有運行」。
