大公網12月28日訊（記者 龔學鳴）：作為環保署嘅吉祥物、負責向公眾推廣「惜食文化」嘅「大嘥鬼」，一直深受市民歡迎，環保署仲為佢開咗個Facebook專頁，俾佢同市民「交流」之餘，亦可以宣傳環保訊息。「大嘥鬼」就響Facebook發帖，分享自己嘅「成績表」，話自己嘅整體成績退步咗。其中，2015年都市固體廢物棄置總量有371萬公噸，比2014年多咗3.9%，即係每人每日大概棄置1.39公斤垃圾，搞到「大嘥鬼」好傷心，呼籲公眾做好減費回收。
「大嘥鬼」又話，當中紙類廢物大幅增加咗17%，「唔通同大家成日上網買野，積積埋埋好多包裝紙盒又唔去回收有關⁈」有網民就留言話，見到好多網購或內地到港嘅貨物，都係用大量膠紙封住紙箱，但啲人既冇將紙箱回收，亦冇將紙箱上嘅膠紙、塑料分開回收。
不過，「大嘥鬼」都有好消息公布，就係廚餘廢物嘅人均棄置量下跌咗8%，顯示源頭減少廚餘同埋食物捐贈初見成效。希望香港人能夠繼續做好源頭減費、愛護地球啦！
