前人民力量副主席、前線召集人甄燊港，日前就喺謎米網台節目透露，話自己「收到風」，聲稱中方會派人去尋日嘅「反港獨 撐釋法」集會搞事，甚至會搞出人命逼警察開槍都在所不惜，製造香港亂象，藉口取消更多「泛民」議員。另外，佢又話大聯盟因為「維穩費未用曬」，而參加遊行嘅人頭費加到八百蚊，但社團就會從中抽水喎。
嘩，甄生，唔好再誇啲？雖然你個節目無咩人睇啫，但都唔使作得咁大啩？尋日集會秩序不知幾好，次次會出事、掘磚掟人差點搞出人命嘅都係你哋班「港獨」分子搞嘅示威咋，唔好搞錯。
而且次次建制派搞任何集會，都被反對派話係派錢先有人嚟，你哋抹黑都有啲新意啦。大聯盟副召集人陳曼琪尋日喺台上發言嘅時候都特別澄清，參加者係自發參與集會，若說集會人士係收錢先到場，就係抹黑。另外，唔該甄生都返去問下你嘅台灣朋友，係邊個大撒「黑金」、搵人搞「港獨」先？
