柯創盛和一班老友記。大公報記者黃昱攝

　　大公網8月2日訊（記者黃昱）「吹啊吹，讓這風吹。」「妮妲」喺今日凌晨大搖大擺咁掠過香港，天光之後香港好似變咗樣，雖然未至於滄海桑田，翻天覆地，不過都絕對係雞飛狗走，亂七八糟。「八號波」一落，唔少立會參選人就已經「暴走」社區，了解區情。

柯創盛和一班老友記。大公報記者黃昱攝

　　觀塘區議員柯創盛（柯仔）延續民記多年來嘅優良傳統，每逢打風必定去茶果嶺視察颱風對街坊嘅影響。尋日佢巡區嗰陣，仲偶遇一班1995年就相識嘅街坊同老友記。原來當年打風之後，民記兩位元老譚耀宗同陳鑑林帶住柯仔落茶果嶺巡區，都有同呢班街坊了解區內情況。「茂發苶室」嘅華哥仲保留住當年嘅剪報，雖然已經發黃，不過華哥專登去過膠，認真有心。而家柯仔有樣學樣，每次打風都重遊故地，梗係氹到一班老友記開心到不得了啦。

　　民記主席李慧琼（Starry）最掛心嘅，就梗係自己擔任區議員嘅土瓜灣區，佢兩點左右趕到現場，之後一邊同街坊傾偈，一邊留意區內排水、塌樹同埋垃圾堆積嘅情況，認真係「眼觀六路，耳聽八方」。

　　李慧琼已經報名參選「超級區議會」，其他名單包括：周浩鼎、王國興、陳琬琛、梁耀忠、塗謹申、鄺俊宇、關永業、何啟明。柯創盛已報名參選九龍東立法會選舉，其他參選名單包括：黃國健、謝偉俊、譚文豪、胡志偉、陳澤滔、胡穗珊、譚香文、譚得志、黃洋達、高達斌、呂永基。