大公網7月13日訊 唔知大家搭地鐵嗰陣，有無留意到地鐵車身有塗鴉呢? 日前「The Grifters」上載咗一段最新短片，惡名昭彰嘅外籍情侶Ether與Utah曾多次潛入多個亞洲城市的鐵路系統塗鴉，而短片開段係拍攝佢哋潛入九龍灣車廠。佢哋首先深夜喺車廠外圍徘徊，之後就以「迅雷不及掩耳盜鈴」嘅方式剪爛防盜鐵路，跟住就爬入去。佢哋之後就搵到目標地鐵，隨即熟練地噴上「CRIME TIME」嘅字眼。當有港鐵職員發現後，佢哋就立即逃走。
不過片段去到尾聲，就變咗日頭，佢哋竟然又成功潛入柴灣車廠繼續塗鴉，事後仲喺筲箕灣站同鰂魚涌站影低自己嘅「大作」，在場市民依然毫不察覺車身有咩特別。
嘩嘩嘩！鄭晴到底係咪睇緊港產片呀? 港鐵車廠好似「無掩雞籠」咁，外國人輕輕鬆鬆就可以入到去，如果佢哋唔係塗鴉，而係做其他嘢，咁就大穫啦！港鐵發言人話，片段中涉及九龍灣車廠同埋柴灣車廠，分別發生係2011年至2015年期間，又已經就事件報警，呼籲市民唔好以身試法喎！其實，港鐵過往都出現列車被塗鴉嘅事件，例如2013年6月，港鐵東鐵綫沙田站其中一個車卡就畀人塗鴉。鄭晴呼籲各位，唔好以身試法！唔好以身試法！唔好以身試法！因為好重要，所以要講三次。
