（左起）新思維嘅黃俊瑯、彭意婷及狄志遠
立法會選舉提名期在即，主張中間路線嘅新思維話，積極考慮出選九龍西、新界東和新界西直選，其中九龍西擬派一張三人名單出選。鄭晴發現，名單當中除咗主席狄志遠同秘書長黃俊瑯外，仲多咗個新面孔，就是年僅21歲、外表亮麗的社區主任彭意婷（Marie）。原來意婷BB仲未畢業，喺理工大學讀中文及雙語系四年級，意婷BB同鄭晴講，自己參加過 「佔中」，但好快就好迷惘，認為爭取民主唔一定要衝擊、掟磚。佢話加入新思維係想話畀人知，年輕人都有理性同支持中間路線。
鄭晴都留意到，同新思維路線比較近嘅民主思路都想派人出選九龍西。對於 「撞區」，狄志遠就話自己心入面有個方案，一直都有同對方傾，希望協調成功，星期六公布結果。結果阿狄呢頭講完，轉頭即刻有人稱新思維同民主思路有機會同組名單哦。民主思路就同鄭晴澄清話，從來無同任何黨派就選舉有任何協議，更何況用同一張名單出選，任何這方面之消息全屬虛構。
