圖：周浩鼎（後排右二）同葛珮帆（後排中）派揮春

　　農曆新年就嚟到喇，唔少立法會議員同區議員都鍾意擺嚇街站，寫揮春畀街坊看門口，同大家共度新歲。早兩日工聯會郭偉強（阿強）就喺北角和富中心擺街站，同街坊朋友拜個早年。不過未搵到阿強寫揮春嘅朋友都唔使擔心，阿強嚟緊星期六下晝，同下星期一嘅上晝，仲會分別喺新光戲院門口同渣華道街市門口再寫過，有興趣嘅朋友記得到時去攞返張喇！

　　容海恩手字「比較有特色」

　　另外，鄭晴之前喺活動同新民黨容海恩（Eunice）同新社聯嘅李世榮（Stanley）傾開，Stanley話最近都好畀心機練字，之後新春活動可以一技傍身，又問Eunice手字練成點。Eunice就講笑話，佢手字已經隨時ready，不過就比較有特色。講講嚇，佢地仲話，原來民建聯周浩鼎Holden寫得一手好字喎！咁啱得咁橋，民建聯葛珮帆（EQ）同Holden尋日原來已經落咗西貢派揮春，聽聞好多街坊都很喜歡，仲排隊爭住拎各位議員嘅墨寶。

　　唔止佢哋，民建聯劉國勳（Edward）同獨立議員謝偉俊（Paul），亦親自出動為街坊即席揮毫，希望將福氣帶畀市民。Edward話，自己雖然成年無寫過大字，但仍然有好多街坊捧場，仲講到最鍾意寫嘅就係「心想事成」，貪佢夠好意頭。而阿paul就孖住老婆「白姐姐」白韻琹，一邊寫揮春一邊派利是封，唔好話街坊，鄭晴見到「白姐姐」一手靚字，都心思思想排隊，攞返張揮春，順便幫屋企新春布置做定準備。