圖：Eunice睇落打機都有板有眼/網上圖片
立法會暑假未完，一向鍾意打機嘅新民黨立法會議員容海恩（Eunice），尋日晏晝就到咗香港首間以電競為主題嘅酒吧Versus Stadium，試玩格鬥遊戲Street Fighter V，仲透過Facebook直播打機實況添。見到Eunice一臉認真，控制遊戲角色春麗出拳踢腿，有板有眼，睇嚟唔似係新手喎。
Eunice同鄭晴講，Versus Stadium嘅商業模式創新，亦會搞唔同活動嚟推廣電競，為年輕人提供一個聚腳點，自己都會考慮約網民喺嗰度見面，過番兩招。佢話，新民黨早前約見特首林鄭月娥，就新一份施政報告表達意見，當中就建議政府推動電競產業發展，又希望政府能夠訂明由邊個決策局負責電競發展事宜，盡快接觸業界唔同嘅持份者。
