圖：標題「飛越」兩字，隱藏「九七」字樣，紀念回歸20周年
政府開發土地，近年經常遇到反對聲音，發展局局長黃偉綸（Michael）尋日發表網誌，介紹地政總署測繪處編製嘅航空照片集《飛越香港20載》，同時強調大家身處同一個「香港地」，政府從來都無「重發展、輕保育、棄郊野」嘅動機，市民絕對可以放心。
啟德廿年 機場大變身
Michael介紹嘅《飛越香港20載》，係地政總署測繪處趁回歸20周年編製，展示香港過去20年重大變遷，包括新舊建築物、基礎建設項目，以及各種地貌的對比照片，鄭晴睇過部分圖片，真係好似走入時光機一樣，好神奇呀！
揭開本書，其中一頁係1995年嘅啟德機場，當年飛機就係喺度升降，勾起鄭晴唔少外遊回憶；對比今日，停機坪已經變身啟德發展用地，目前仍然動工，正所謂有發展先有進步嘛！
照片集有五個特色主題，包括規劃基建、交通運輸、公營房屋、康樂文化、自然保育，Michael特別提到「自然保育」，解釋當政府談論發展時，部分市民覺得政府為造地而犧牲自然生態保育，但其實大家身處同一個「香港地」，政府從來都無重發展、輕保育、棄郊野嘅動機，喺發展之餘亦唔會忘記活化歷史建築，以及保護鄉郊美麗嘅大自然環境，會盡力平衡發展與保育，達至可持續發展。
