話明係反對派，佢哋當然咩都反對啦，尤其係高鐵「一地兩檢」。已經喪失議員資格嘅姚松炎，同埋前立法會議員、公民黨吳靄儀，尋晚就去咗香港天主教正義和平委員會搞嘅「一地兩檢」研討會。姚松炎就話，今個月16號就會有公眾諮詢會，屆時「一地兩檢關注組」邀請咗好多替代方案嘅倡議人出席，好希望大家嚟畀意見，好似「佔中」商討日咁喎。
鄭晴聽到真係得啖笑。「佔中」搞完一大輪，最終嗰啲咩商討日都係無咩意義，當初話咩「佔中」同意書、「佔中」十死士，結果而家咪無咗回事囉。「一地兩檢關注組」又學埋戴耀廷啲衰嘢，結果就真係可想而知。
另外呢，吳靄儀為咗抹黑政府，真係咩都講得出，話只要識字嘅人，唔使係大律師，都可以睇到「一地兩檢」係違反基本法第18條喎，又話基本法第20條根本無講到租地方出去，就係畀其他人用埋香港以外嘅法律。講開又講，呢位吳靄儀前議員真係好有「義氣」，從撐「西瓜琦」、「河童」到而家「一地兩檢」，乜研討會佢「老是常出現」。不容易，不簡單！
