圖：青年民建聯遞交萬名市民簽名，要求巴士公司提供學生乘車優惠
今日係開學日，學生哥又要開始晨早起身搭車返學，不過對於要以巴士代步嘅大學生、中學生嚟講，最慘係交通費無得好似港鐵咁享受半價優惠。青年民建聯尋日就到政府總部外請願，向運輸及房屋局代表遞交一萬個來自全港18區市民嘅簽名，要求巴士公司為學生提供全面嘅學生乘車優惠。
民建聯立法會議員柯創盛話，巴士公司識得申請加價，但唔識得改善服務水平，亦唔肯提供學生優惠，實在講唔過去，民建聯將會喺立法會交通事務委員會跟進呢個議題。
青年民建聯主席顏汶羽就話，學生以校網做學位編配，大部分人無法受惠於九巴嘅長途回程半價優惠，城巴新巴「更加無優惠可言」。顏汶羽期望，政府同巴士公司商討，為學生提供全面乘車優惠。巴士公司亦應做好企業形象，減輕基層學生負擔。
