圖：麥美娟提醒大家給媽媽一個擁抱/麥美娟fb圖

　　「無法可修飾的一對手　帶出溫暖永遠在背後～」尋日係母親節，唔少孝順仔女一早準備好鮮花同禮物氹阿媽開心，感謝阿媽長期嘅辛勞。各建制派立法會女議員紛紛出動，同市民歡度節日。民建聯主席李慧琼（Starry）同一班媽媽喺區內派花，慶祝母親節，其間見到有唔少爸爸同小朋友，帶住媽媽一齊出外飲茶慶祝。Starry就話，佢自己都係做人媽媽，其實媽媽想法好簡單，只要子女開心健康，就係最大幸福，唔需要特登搵日大費周章，「日日都係母親節」咁話。

　　提大家珍惜相處時光

　　另外兩位民建聯婦女代表─立法會議員蔣麗芸（Ann姐）同葛珮帆，當然都有出動派花啦。一向好唱得嘅Ann姐，仲喺Facebook度轉載歌曲「世上只有媽媽好」，唔止用行動，仲用聲音多謝媽媽。佢話，呢隻「世上只有媽媽好」幾乎係每年母親節必聽嘅歌，聽完片段中嘅小女孩唱歌，就連鄭晴都忍唔住眼濕濕，希望Ann姐下年可以親自唱，為一眾辛勞嘅港媽送上祝福啦。

　　催淚嘅唔止Ann姐，工聯會立法會議員麥美娟喺母親節前夕，亦透露想念媽媽嘅感受。原來，麥美娟媽媽已經離開咗30年，話能夠攬着媽媽，親口講句「我愛你」係福氣。佢又感謝各位偉大媽媽對子女無私的愛護，勸勉各位網友要珍惜同媽媽相處的時光，「平時點忙都好，在這個特別的日子不妨將一些遺忘了的心底話告訴媽媽，給她一個擁抱。」

　　至於經民聯梁美芬亦去咗九龍西三區派花，仲同一位99歲嘅媽媽飲茶。雖然工作好忙碌，不過美芬話，點樣都好，晚上都會同媽媽食飯慶祝。

　　鄭晴