大公網5月11日訊（記者 龔學鳴）：香港律師會將於本月26日舉行周年大會，屆時將選出五人擔任理事會成員，任期四年。共有八人競逐理事會成員，參選人包括前律師會會長兼立法會議員何君堯（Junius）。不過，選舉未開始就已經聞到火藥味。事緣「法政匯思」召集人任建峰響報章撰文，聲稱何君堯唔係擔當律師會理事嘅恰當人選。Junius就相當不滿，要求任建峰收回所有誹謗言論，同埋作出道歉聲明。
任建峰以執業律師身份響《蘋果日報》撰文，列出多個原因批評Junius唔適合擔任律師會理事，包括聲稱Junius無視「一國兩制」、侮辱女性同同性戀人士等，呼籲律師會會員唔好投票俾佢。
Junius就響Facebook發帖還擊，表明自己「從來不怕真小人，更無懼那些偽君子！」又批評任建峰對佢作出嘅指控，全部都係「失實無據的惡意誹謗」。佢話，自己政治立場鮮明，熱愛祖國，同時又維護香港繁榮穩定，「何來有錯？」；又強調自己冇藐視法庭、亦冇對女性及性小眾不恭。
