大公網5月10日訊（記者龔學鳴報道）民陣今日煞有介事咁話，收到康文署電話通知，話今年七一遊行唔可以係維園出發。民陣召集人區諾軒引述康文署聲稱，根據內部指引，視乎申請團體性質決定優先租用次序，而今次場地會優先租予各界慶典委員會用作慶祝回歸活動用途。佢仲話，由03年開始都係維園做起點，過往建制派都係申請上午，而家下午都申請埋，話相當離譜，仲話政府今次係要為回歸20周年，國家領導人嚟港洗太平地喎。
Book唔到場就話洗太平地，民陣你唔好咁無賴啦！維園係咪屬於民陣呢?03年租開就係屬於你架? 立法會民政事務委員會副主席吳永嘉就話，相信預訂場地嘅原則係先到先得，來自廠商會嘅吳永嘉就以工展會為例，話廠商會每年都係維園搞工展會，一樣無優先權，只可以盡早預訂，所以每年開幕日子都唔同。只要按足程序訂場兼且無出錯的話，就唔可以講話係政治原因喎！聽到未呀?
