大公網2月15日訊 俗語有雲，「生不入官門，死不入地獄」，不過工業界（第二）立法會議員吳永嘉（Jimmy）身為律師樓合夥人，當然就唔怕入官門（即法院）打官司啦，但估唔到，出名對食同煮法都好有研究嘅佢，原來最怕入廚房！
Jimmy話，原來佢十幾年前曾經喺屋企想用爐頭烘乾一個洗完嘅煲時，掛住睇電視，一唔留神就燒着咗個煲，差啲釀成火災，自此之後就已經廿幾年無煮嘢食，連煎蛋都唔會，最都只係煮嚇即食麵。
唔煮嘢食，至少要幫手洗碗補數？一樣唔洗。原來Jimmy後生嗰時曾經整親腰骨，有一節脊骨移位，條腰無辦法長期維持同一個動作，所以佢有大條道理唔洗碗架。Jimmy仲話，佢曾經有一段時間係長期獨居，但因為佢一直都無用過個廚房，到有人嚟睇樓時，成個廚房仲係原封不動新簇簇，個單位都因為咁特別受歡迎。
