大公網2月15日訊（記者 龔學鳴）：「跟車太貼，隨時車毀人亡」，揸車如是，講說話亦如是，但「熱血公民」立法會議員鄭松泰似乎就唔明呢個道理喇。佢早前老屈有懲教人員涉嫌虐囚，已經令到懲教事務職員協會好不滿，仲寫信俾鄭松泰要求道歉添。民建聯葛珮帆（EQ）亦計劃就事件對鄭松泰提出譴責動議。不過，鄭松泰唔單止唔認錯，仲響Facebook反指建制派「借題發揮」、「上綱上線」喎。
EQ話，其實鄭松泰已經唔係第一次做錯事之後「死雞撐飯蓋」架喇，話佢當初倒插國旗之後，寧願認自己係「小學雞」都唔肯認錯，仲一直狡辯。佢話，鄭松泰今次「抽水抽着火水」，打擊懲教人員士氣之餘，亦令市民對懲教人員產生誤解，佢會循唔同渠道跟進事件。
工聯會何啟明亦都希望鄭松泰能夠認錯，「死拗冇意思」。佢又話，懲教係「有辱無榮」嘅職業，人員流失率已經高，今次仲出現鄭松泰一事，難免會令懲教人員士氣更加低落。
