圖：游小姐對議事規則嘅「無知」，唔少網民都留言叫佢返去補下習先　　 設計圖片

　　青年新政游蕙禎成功掃低黃毓民之後，連日嚟都喺唔同議題上展現「議事水平」，尋日佢又展現咗佢對議事規則BB級數嘅認知喇！話說游小姐尋日出席電台節目嘅時候，話上任之後，假如遇到修改議事規則或審議條例草案嘅時候，會盡量留喺議事廳，因為喺議事廳先可以有能力影響投票結果，又唔排除視乎票數決定拖延表決行動。

　　網絡意見領袖仇思達就立即喺facebook發帖，揶揄游小姐見識少，「如果建制派提出修改議事規則，係需要分組點票嘅。夾實『泛民』嗰十幾票就得，拉乜嘢布？」另外，坐喺議事廳開會根本係天經地義，係議員應有嘅責任，千祈唔好話咩「盡量」坐喺議事廳，好似好大犧牲咁。見到游小姐嘅「無知」，唔少網民都要留言叫佢返去補下習先。

　　鄭晴就覺得游小姐，應該叫佢游同學先得，真係要好好地虛心學習。好似之前佢喺政綱就寫香港開採天然氣，結果喺選舉論壇就畀黃碧雲問到口啞啞，而家就話遇到修改議事規則會拖延表決。連佢嘅黨友梁頌恆都係咁，明明規定立法會主席要40歲，佢就推舉唔夠40歲嘅朱凱迪或鄺俊宇去做。青政講嘢咁有「話題性」，唔怪得啲網友有咁多回應，忍唔住要話下佢哋。