圖：兩位小朋友同埋佢哋嘅導師用色士風吹出《月亮代表我的心》
音樂堂慈善基金會同其他組織搞咗個「音樂無界限」嘅義教計劃，等一班基層小朋友有機會學色士風、結他等嘅樂器。早幾日佢哋學成「畢業」，喺科學館演奏廳「登台」演出。嘩，真係一聽聽出耳油呀！兩個小朋友同埋佢哋嘅導師用色士風吹出《月亮代表我的心》，雖然細路有少少緊張，但都吹得有板有眼，完全吹出首歌嘅情懷，真係「輕輕的一個音，已經打動伍聲心。」
基金會主席高松傑就話，唔少基層都覺得「輸在起跑線」，所以就想用短短八星期，義教色士風、結他之餘，仲幫佢哋搵埋二手樂器，等佢哋學成後有返「一技傍身」，相信喺學校都易啲入校隊，甚至將來闖出自己一番事業。出年基金會會喺3至12月期間繼續搞呢個咁有意義嘅活動，心思思想義教、捐樂器嘅善長人翁，或者有興趣參加嘅小朋友，記得打去2380 7321 / 8100 3828 同秘書處聯絡。