郭偉強 大公報記者 蔡文豪攝
大公網12月7日訊（記者 龔學鳴）早排轉天氣，見街上都有唔少人中招病倒。聽工聯會郭偉強講，佢嘅B仔之前都病咗，不過擔心咗足足一個月之後，BB已經好返喇，身為爸爸嘅呀強都放心曬啦。
我都好好奇呀強點樣照顧BB，呀強就話，帶BB去睇醫生都係派嗰啲藥，要好返始終都係靠BB自己嘅抵抗力。咁強B抵抗力點樣先強上加強呢?原來就係靠媽媽喺粥仔加入南瓜同菜碎嘅營養愛心餐喇。營養高，味道好，愛心足，唔怪得B仔好得咁快啦。呀強仲話，BB而家相當精靈、生猛，同爸爸媽媽一齊食飯嗰陣仲成日搶佢地食嘅嘢，開始扮大人喎。
聽呀強講，BB病咗之後，佢同太太都跟住被惹病埋，自己都未好返曬呀。佢話好多屋企有小朋友嘅家庭都係咁，無辦法喎。我覺得呀強真係好畀心機做嘢，自己帶病工作，又要成日返立法會開會，又要成日約食環署去北角視察環境衞生，工作繁重之餘都要把握時間休息養病，好好保重身體呀！
