上任四個多月嘅「一帶一路」專員蔡瑩璧（Yvonne），尋日同傳媒見面，介紹「一帶一路」辦公室工作。佢同鄭晴分享，「一帶一路」可為香港帶來好多機遇，但企業需要更詳細、實時嘅資料，例如沿線國家嘅地緣政治、營商環境等，辦公室正喺資訊方面做更多嘅工作。

　　收集成功故事

　　Yvonne又話，雖然目前「一帶一路」嘅項目多數係大型基建，中小企未必參與到，但香港喺服務管理方面有優勢，她亦見證過有港資中小企透過專利技術參與公路項目，辦公室會搵多啲「成功故事」，向業界分享，帶動其他企業走出去。

　　早年已經從政府退休嘅Yvonne話，自己覺得「一帶一路」工作有意思，先答應出任專員，無人工都無所謂，咁仲唔使立法會通過公帑撥款，讓工作可以盡快開始。　　佢強調，「一帶一路」涉及嘅範圍廣，唔係短期內就看到成效，希望大家將眼光放遠，佢又認為無論係企業抑或大學，社會各界普遍都對「一帶一路」愈來愈感興趣。問到上任後去咗幾個沿線國家考察，Yvonne笑言，自己唔係旅遊專員，只係去咗哈薩克斯坦同越南，又去咗北京同有關部委官員見面。

　　特首梁振英喺今年嘅《施政報告》推出十億元「一帶一路」獎學金，吸引沿線國家嘅學生來港讀書，不過撥款仲未交上立法會財委會審批。Yvonne形容，資助呢批學生來港讀書係一種「投資」，相信佢哋將來可以成為香港嘅大使或代言人，幫助香港企業帶到佢哋嘅國家進行商業活動。

　　同場嘅「一帶一路」副專員陳子敬（Patrick）話，現時辦公室只有11個人，忙到踢曬腳，希望日後立法會能夠通過增加資源嘅撥款，開設更多嘅職位。他又話，辦公室正草擬有關「一帶一路」商機嘅清單，為業界提供更詳細嘅資訊。