大公產品

首頁 > 产品 > 港东港西 > 正文

Horace大道理K.O.尋釁者

時間:2016-10-25 03:15:15來源:大公網

  圖:Horace話生氣嘅原因係立法會內兩位年輕人辱罵祖國\網上圖片

  雖然近日宣誓辱華搞到滿城風雨,但總有些人「死雞撐飯蓋」,不但點都唔肯認錯,仲懶醒咁夾硬拖埋其他人落水。好似近日就有人翻舊Post,話民建聯立法會議員張國鈞(Horace)既然譴責「港獨分子」辱華,就唔應該學習劍道,仲聲稱佢跪坐時將竹劍放佢右邊,Men(面)同Kote(甲手)放左邊係錯咁話。不過,呢啲懶醒嘅言論就畀Horace一秒「K.O.」,佢仲勸網民「毋忘歷史,也要學懂寬恕,才不會停留在昔日的仇恨中生活」。

  Horace尋日係Facebook回應呢件事,話啊作者先生/女士似乎到而家都未知道香港人憤怒嘅原因,其實根本就唔係咩仇外排外,亦都無人叫大家罷買日貨或停止去日本旅行,因為生氣嘅原因係立法會內兩位年輕人用粗言穢語辱罵祖國,且事後不知悔改。

  佢更加覺得,民族之間應該相互尊重、愛好和平,「我們重視歷史、毋忘歷史,希望以古鑑今,學會反省、學懂謙卑。我們也要學懂寬恕,不會停留在昔日仇恨中生活」。鄭晴就好贊同Horace的話,如果「作者」覺得誣陷人哋就可以幫兩個人轉移視線同減輕壓力,咁就真是太低估香港人嘅智慧喇。

  Horace最後仲「溫馨提示」嗰位識少少扮代表嘅「作者」,竹劍擺右邊,表示並無惡意,先禮後兵;相反放左邊,即表示已進入戒備狀態,可以隨時進入攻擊。學嘢啦,鄭晴希望以後呢位「作者」咪再出嚟作嘢囉。

最新要聞

最新要聞

最受歡迎