負責選出新一屆行政長官嘅選舉委員會，會喺11月8日至11月14日接受提名。反對派計劃派超過20人參選建築、測量、都市規劃及園境界，試圖喺呢個反對派上屆只有一人當選嘅界別「搶灘」喎。其中，現任選委吳永輝聯同建築師陳耀輝、李鉞合組「專業．民主．起動」平台，聲稱計劃搵一啲支持重啟政改、反對梁振英連任嘅「志同道合」人士合組名單參選喎。
其實，現任建築、測量、都市規劃及園境界立法會姚松炎等多名反對派功能組別議員，上個月已經組成「專業議政」，密謀協調反對派搶攻多個選委界別席位。被問到點解要另起爐灶，陳耀輝就話會同「專業議政」嗰邊保持聯絡，仲話「專業議政」內部都仲有嘢未傾好。吖，唔知吳永輝係咪因為當初「以大局為重」為由，讓路「同路人」姚松炎選議員，到依家個心仲有啲唔舒服，所以堅持「分隊」呢？
查實鄭晴睇返姚生喺立法會選舉嘅得票率，只有不足四成四，面對實行全票制嘅選委會選舉，每位選民可以投票支持多過一人嘅情況下，反對派已經好蝕底，加上姚生之前學人「玩嘢」宣誓，差啲搞到無法就任，呢件事亦都令反對派難以吸納中間派人士支持。計嚇計嚇，反對派莫講話要做界別入面嘅多數，就連贏唔贏到議席都成問題吖！
