有「亞瑟王」之稱嘅李國章，作風一直無懼批評，佢尋日出席電台節目時就講起，想當年擔任中文大學校長時，對教育制度改革有唔少意見同批評，咁啱同前特首董建華都有交流下意見。其後，董生仲邀請佢入局出任教育統籌局長，雖然佢有諗到做大學校長「舒服又高尚好多」，但為咗教育發展同埋改革，無法子唔接受責任，如果批評多多唔肯做唔係好啱，所以當年應邀出任局長，又指「做咩政策都係艱難」。
李國章提起，當時嘅財爺梁錦松要嚴格控制政府開支，各部門開支削減10%，佢提出實行配對籌款機制，當大學籌到一蚊，政府就畀一蚊，但就有唔少大學校長鬧佢，「將校長變成乞丐，要四圍去乞錢！」佢尋日就解釋返，其實當時減咗大學資助約13憶，但大學自己連同政府配對資助有21憶，比實質政府給予嘅仲多。
李國章又講到，今年初就任港大校務委員會主席時，遭到學生罷課反對。佢話，早喺回歸前，當時嘅港督彭定康委任他為中大校長亦遇到學生衝擊，仲話當時嘅大學生同而家嘅一樣咁激，「當時瞓曬係我架車前面」添。
