青年新政梁頌恆同游蕙禎，早前喺立會宣誓嗰陣，將「China」讀成「支那」，之後仲話唔覺得「支那」有侮辱嘅成分。民建聯立法會議員蔣麗芸（Ann姐）（圓圖）近日就搵嚟一段內地紅色青春劇「恰同學少年」約三分鐘嘅片段，片中角色孔昭綬校長就正向學生講到「支那」一詞。
孔昭綬話，「支那」解作「愚蠢的，精神有問題的中國人」，被叫「支那」係恥辱，「我泱泱大國，巍巍中華，竟成了諸般列強眼中的蠻荒未開發之地」。佢又話，「人，不可不知恥，無德操無學識，係個人之恥；而無綱紀喪主權，就係國家之恥」。嘩，鄭晴覺得呢段說話，簡直就係為某些既唔識歷史，又成日諗住「港獨」嘅候任議員度身訂造，無論係個人之恥，定係國家之恥，都驚人咁脗合。
精彩仲喺後頭，孔昭綬仲話，「一個國家被人恥笑，那麼個人也將成為被別人恥笑的把柄。支那之恥，無有個人與國家之分，此乃我中華全體之奇恥大辱！」唔知梁、游如果睇咗，喺唔喺仲可以厚住面皮講「支那」無侮辱性呢？
