大公產品

首頁 > 产品 > 港东港西 > 正文

禮拜六吳局長「摸底日」\鄭晴

時間:2016-09-23 03:15:24來源:大公網

  數近期嘅關鍵詞,「摸底」應該紅爆。其實古今中外,「摸底」唔係啲咩新鮮事。嗱,教育局局長吳克儉其實都係「摸底」常客,聽講對政策推行頗有幫助添。

  唔講唔知,呢兩三年嚟,吳局長每年都搵幾次星期六,分別同各區校長會、辦學團體啲阿頭茶敘。鄭晴仲知道,呢啲茶敘通常每季一次,好似引起全城關注嘅小學TSA、上學年令人好擔心嘅學生自殺問題,都係局長同大家茶敘嘅焦點。同校長們講嘅,自然與學校運作、教育資源有關啦。

  由於係禮拜六,大家相對輕鬆,唔使好似平時咁趕。茶敘地點係政總?教育局九龍塘服務中心?都唔啱。答案係,會所之類場地。

  仲有仲有,作為教育重要一分子(官方鍾意稱之為持份者)嘅家長,都係局長「摸底」嘅重要對象。就住大部分家長都要搵食,局長同佢哋啲「摸底」時間,多數揀喺黃昏以至晚上,TSA、功課以至升學出路,甚至「港獨」入侵校園,家長表現得特別肉緊。

  喺呢類茶敘時間,局長一邊聽家長、校長以至辦學團體負責人吐苦水,一邊又同佢哋就政策解畫,各抒己見,互噴口水。呢種雙向互動嘅做法,係局長喺正式諮詢以及與學界、家長團體開會之餘,收集意見嘅有效途徑。睇嚟,為政策「摸底」,都係有用嘅。

最新要聞

最新要聞

最受歡迎