國家奧運精英尋日結束一連三日的訪港行程，好多市民都依依不捨送行。民政事務局尋日下晝就喺facebook大派福利，獨家播放中國女排喺旅遊巴上演「中國好聲音」嘅片段。一班美女開金口大唱內地歌手張傑嘅《年輕的戰場》，盡展悅耳歌喉，「打得又唱得」，連民政局小編都忍唔住hashtag「#中國好聲音」。
鄭晴見到喺約分半鐘嘅片段中，女排成員望住手機合唱，副歌時仲激昂地唱：「今天我終於站在這年輕的戰場，請你為我驕傲鼓掌，今天我將要走向這勝利的遠方，我要讓這世界為我激盪」，回想起今屆奧運女排嘅亮眼成績，鄭晴覺得成員好似用緊悅耳嘅歌聲，宣告國家女排會繼續努力稱霸，叫世界為她們激盪。
