大公產品

首頁 > 产品 > 港东港西 > 正文

美芬好歌陸續嚟

時間:2016-08-27 03:15:20來源:大公網

  圖:新歌《有你共鳴》,美芬親自填詞

  立法會選舉最後倒數,面對九龍西嘅激烈競爭,爭取連任嘅經民聯梁美芬不斷有新搞作。繼前排推出勁洗腦嘅《反拉布之歌》獲得街坊好評後,美芬又同佢嘅競選團隊推出新歌《有你共鳴》,仲喺錄音室拍埋MV,美芬親自填詞添,真係好畀心機啊。美芬同鄭晴講,依家政壇咁亂,市民都好煩厭,希望透過歌聲令社會氣氛紓緩下,讓大家多啲聆聽同包容,多啲正能量。鄭晴尋日搶先睇咗MV,美芬負責唱副歌部分,其中一句「衷心感激所有和應,事事盡力滿心真誠化作回應」,相信都係佢想同選民講嘅心底話。美芬預告,新歌MV今日喺佢facebook就有得睇喇。

  講返選舉,近排不少民調都指美芬支持度好高。美芬就話民調一定唔係反映真實情況,呢啲民調對佢選情都有影響,就係萬一支持者誤以為佢贏硬,就鬆懈唔去投票,反而會令佢選情好危,所以佢提醒選民一定要投票。民調有無副作用,鄭晴就唔知喇,但選舉工程就有其他副作用,例如美芬每日都不停落區,又同街坊握手,就搞到右手同腳都要貼膠布。九龍西嘅候選名單仲包括蔣麗芸、狄志遠、吳文遠、何志光、毛孟靜、譚國僑、朱韶洪、黃毓民、黃碧雲、林依麗、關新偉、劉小麗、游蕙禎同李泳漢。

最新要聞

最新要聞

最受歡迎