一段疑似在的士上偷拍的車廂「偷情」短片，昨日在網絡上瘋傳，歌手許志安終於在晚上現身，承認自己是片中「男主角」，在記者會上「眼淚鼻涕」的向妻子認錯之餘，還自稱係「壞咗嘅人」及宣布暫停工作。

　　呢個「壞咗嘅人」，在圈中打滾多年，已經有名有利、又家有「名妻」，總算已過得不錯，還如此不知自重，不知檢點，「只要就手」，黐到埋身就「唔嘥」，又的確係幾令人不齒和睇唔起，睇嚟呢鋪「衰咗」之後，有排翻唔到身。

　　不過，「壞咗嘅人」顯然唔止許志安一個。另一個「壞咗嘅人」係那名的士司機。許志安壞咗嘅係「品」，呢個「的士佬」壞咗嘅就係「腦」。

　　身為一位職業司機，揸住架的士周圍接載乘客，一些起碼的人格操守和法律常識應該係唔少得嘅，如駕車時應專心留意路面情況，不要講手機、睇APP，已經係最起碼嘅要求，否則不僅對乘客安全唔負責，更隨時有觸犯法例之嫌。

　　而眼前這名「壞咗腦」嘅的士司機，駕車時不僅不專心致志，還利用車中的攝影鏡頭把車廂後座乘客的一舉一動偷偷拍攝下來。而這一做法，肯定是在乘客不知不覺的情況下進行的，如此稱之為「偷拍」，絕對冇冤枉。而偷拍涉及侵犯他人私隱，隨時是要吃官司的。

　　而司機「壞腦」，更有一個「壞心」的，就是把這段片放上網的《蘋果日報》。

　　鼓勵偷拍和重金有賞，是這家「壞心」傳媒的一貫伎倆，完全喪失傳媒應有的社會良知和責任心。據說，「的士佬」這條片賣了不少錢，如司機偷拍犯法有罪，促成「偷拍」交易的《蘋果》又如何脫得了罪責！

　　過去，《蘋果》已有過出錢畀人去嫖妓的「自製」新聞，敗壞傳媒操守、損害社會風氣，鼓動「佔中」又政治禍港，如此《蘋果》，真係惡貫滿盈。