又有暴徒被放生？前年黑暴期間，警方喺灣仔一個單位搜出大量示威常用物品，以及可以製造汽油彈嘅材料，現場六人被捕，被控串謀暴動罪同埋一項串謀參與非法集結成為交替控罪。不過，區域法院法官沈小民（小圖）近日竟然裁定呢六個人全部罪名不成立。
沈官畀出嚟嘅理由係，涉案單位內搜出嘅物品都有「合法用途」，唔可以視作攻擊性武器，反而質疑警方「為何到該單位時沒有發現任何製作品及半製成品？」佢又舉例形容，「有如鎖匠會開鎖但不一定會爆竊，穿黑衣及有相關裝備不一定是暴力示威者」。
睇到呢度，大家係咪覺得似曾相識？無錯，沈官去年審理一宗灣仔暴動案時就講過呢番說話，話去暴動現場未必係暴徒，可能係為咗親身見證歷史時刻；帶備防護裝備亦無可厚非，因為唔能夠保證唔會遇到暴力場面；即使被捕前逃跑亦未必係畏罪潛逃，可能係響應警方警告而離開……當時就有網民形容沈官似被告嘅辯護律師多過似法官。
市民促律政司上訴到底
市民Ellie Chan喺網上留言話：「如果在一間屋內搜到用來製造毒品材料，都唔犯法啦，因為仲未製成毒品。」有市民就寄希望於律政司，Rick Yu話：「律政司，廣大市民對你有合理期望，請彰顯公義，上訴到底！」
