圖：顏武周（圓圖）近年多次同政府唱反調，由佢做主席嘅新公務員工會昨日宣布解散。

　　政府要求公務員宣誓擁護基本法及效忠特區，本是再正常不過嘅事，但喺修例風波期間成立嘅新公務員工會，尋晚就喺Facebook發帖宣布解散。該工會主席正正係近年多次與政府唱反調嘅顏武周，佢聲稱自工會成立以來，一直遭受各方各面嘅抨擊，如今宣誓一事在即，預計工會理事有可能無法繼續留在政府，並失去工會會員及理事資格，因此啟動解散工會，以確保工會會員資料及物資得到適當處理雲雲。

　　事實上，以顏武周及該工會嘅所作所為，早已不符公務員政治中立要求。顏武周喺前年修例風波期間，曾公然發起反對政府修逃犯例嘅公務員集會，後來該工會成立，去年元旦參與由攬炒派組織嘅大遊行，對於遊行後來演變成暴亂，工會不單止無批評暴徒，反而指責警方執法。上年六月，該工會又以不滿香港國安法為由，參與發動所謂「罷工罷課公投」，公然煽動反政府情緒。當時政府指出，採取政治性罷工手段反對國家安全立法，係公然違反公務員守則，定必嚴肅追究。

　　得知該工會解散嘅消息後，市民喺網上發出一片揶揄之聲。市民Albert直言：「連擁護基本法及效忠特區咁簡單嘅要求都做唔到，仲點樣服務市民？」市民「水王」就話：「一見宣誓就要解散，仲唔係身有屎？」鄭晴