亂港黑手窮途末路有樣睇？「亂港四人幫」之首的黎智英（肥佬黎）近年愈做愈唔掂，旗下壹傳媒多份刊物先後停刊，黎亦頻頻售賣資產。據報道，黎智英剛以約16億港元賣咗位於台灣新北市土城區、佔地約3.14萬平方公尺的土地和物業；較早前，黎亦已將其位於高雄的印刷物業及土地，仲有台北的「壹電視大樓」同多所辦公大樓等物業相繼出售，似是急欲套現救亡。
孭五案涉七控罪
講開又講，壹傳媒過去五年已累積虧損近20億港元，至少九本雜誌及報章倒閉，日前台灣《蘋果日報》更以新冠肺炎疫情令營運虧損為藉口，宣布分批遣散140名員工，裁員比率逾一成。儘管肥佬黎過去一年不斷炒作黑暴以吸引「黃絲」訂閱，又大打「悲情牌」宣稱受到政治打壓，以刺激「政治消費」，但依然難挽頹勢。
如今肥佬黎不僅生意虧蝕，還累計有五宗刑事案件在身，共面對七項控罪，可謂「兵敗如山倒」。據壹傳媒最新年報披露，作為主席的肥佬黎酬金總額按年大漲九倍，執行董事張劍虹、周達權的酬金總額亦按年分別漲6.73%和7.9%。水浸眼眉，肥佬黎依然肥上瘦下，難怪軍心渙散。
有市民在網上留言，話肥佬黎敗象頻露，是因為香港國安法立法後，美國的亂港資金未能到位，所以要賣地救亡。亦有市民說，肥佬黎亂港多年，正是多行不義必自斃，可以開定香檳提早慶祝咁話。
