人人都話抽中居屋好過中六合彩，但暴亂不但令居屋揀樓由原訂的11月延至下周一（9日），而家又有搞事者喺網上煽動其他人當日發起所謂「三罷」，首日揀樓人士隨時無得揀。暴亂拖慢居屋揀樓進度，有申請者怒斥暴亂搞到揀樓安排失預算，但更多人擔心暴亂拖垮社會經濟，上到車都供唔起樓。
鄭晴問過房委會，揀樓首日只會邀請約80名申請者到樂富居屋銷售中心，分三個時段揀樓，首輪揀樓亦延至10時30分開始，即受邀人數較往年少約10人，全日少一個時段，遲一個鐘開始揀樓，有關安排會持續一段時間。有中咗第二粒珠的申請者同鄭晴講，至今仍未收到揀樓通知，原定聖誕前出遊亦被迫取消，佢好嬲咁話：「香港市民真係多得呢啲暴徒唔少！」
此外，改良版「未補價資助出售房屋出租計劃」初見成效，房屋協會截至周五（6日），合共收到105宗業主申請，包括13個房協屋苑單位及92個房委會屋苑單位。計劃將於12月9日至20日接受合資格租客申請，明年一月抽籤，最快二月有首批成功租賃個案。房協去年九月首推「出租計劃」，只准業主分租單位而不能整個出租，反應冷淡。房委會及房協今年七月通過改良版，包括擴大計劃涵蓋範圍至房委會居屋、准許出租整個單位等。
