我哋嘅反應、處理全部都冇先例可循，好多嘢可能傳媒朋友會覺得慢咗啲，唔出奇，有呢個評論我哋都會反省。

　　管理層低估或錯估形勢？

　　我60幾歲人，都未見過香港依家呢個情況，好多都係第一次處理，所以唔會話管理層低估或者估錯，佢哋亦係第一次面對咁困難嘅情況，用番既定機制處理，但問得好好嘅係，係咪一個好嘅處理手法呢？

　　接任港鐵主席是上錯船？

　　我有冇上錯船呢？冇！身為一個香港人，如果有機會可以貢獻香港，我覺得係我嘅光榮。我知道係難，知道唔容易，但我好開心有一班好支持港鐵工作嘅董事，有一班非常勤力、好願意付出嘅管理層。

　　極速復修設施傳遞錯誤信息？

　　港鐵服務精神係唔可以畀呢啲人（暴徒）威脅，做咩掟爛我啲嘢就怕咗佢？我唔怕你，我做番畀你睇。另一個理由係我哋都要去面對其他正經嘅香港市民，係咪因為有一批暴力者無理衝擊，要令到其他幾百萬市民受苦呢？

　　教育病了？

　　我哋嘅教育制度，今次之後真係要反省，原來多年嘅教育制度唔係好睇住個形勢去處理，教佢加減乘除、教佢數理化，但忽略咗國民教育、中國歷史……我哋好多年輕人聽咗啲嘢唔識去分析，佢哋可以睇到世界各地嘅消息，但睇完之後點去吸收、分析呢？有人話呢粒糖好食，咁健唔健康先？食咗對你身體有冇好處定壞處？