踏入2019年，由《港東港西》與「正氣哥」聯合主辦，首屆「爛蘋果．膠Joke戲．事帝事後頒獎典禮」隆重舉行。作為《港東港西》2019年頭炮大事，幕後團隊與攝製隊連續數周翻箱倒籠，盤點2018最具挑釁性鬧劇，交由「正氣哥」最後專業評審，選出各項「爛蘋果」大獎。今屆競爭激烈，所有得獎人不但實至名歸，更在此「留名」，恭喜恭喜！\鄭晴

　　事帝 陳浩天

　　得獎感言：

　　首先多謝龜仙人教路，以我Hea爆嘅德性，就懶得走上「不龜路」。當然仲要多謝肯陪同我去台灣交足戲嘅感性旅伴，Sorry，係性感女伴，冇咗佢，呢齣「獨」腳戲就唔會咁吸睛，我就唔會咁易砌低至叻「恰」女人嘅「瘋鴿」！

　　正氣評語：

　　「2018最瘋癲，點會唔揀陳浩天？」

　　呢句話，你唔係未聽過嘛？

　　陳浩天今年出曬位，由「玩龜廢青」變身「拖女獨青」，跟住佢搞嗰個乜鬼「香港民族黨」被取締，又再變身「面青青」，整個變身過程在半年之內，用心演活每一個歹角，急速爆紅，以完勝姿態穩奪「事帝」寶座。

　　最誇武術指導 許智峯

　　得獎感言：

　　歌仔都唱到行，嗰首乜鬼《就讓一切除峯》，「瘋峯，瘋峯，恰女EO，有乜作用？直入廁格，扮已失蹤，此刻有種種失控！」單嘢都交咗畀警察查，我冇補充，多謝曬大家！

　　正氣評語：

　　「遇上許智峯，手機必掏空！」

　　文無第一，武無第二，2018年反對派喺議事堂講口又講手，冇乜特別，不過許智峯一出擒拿手，閃電瘋搶女EO手機，仲成功搶埋全城頭條，武藝高強到一個點，呢個獎，佢搶硬！

　　事後 劉小麗

　　得獎感言：

　　人人笑我低EQ，我受；但係話我冇IQ，我就好唔忿氣。話曬我都有個博士銜頭，至少同IQ博士一樣呃得人！不過，當我知道DQ先至夠霸道，我轉攻呢瓣，黐埋班「獨」人玩「自決」，成功呃到兩度DQ，成功自我解決！

　　正氣評語：

　　「IQ EQ乜都低，DQ稱霸劉小麗！」

　　「議事堂DQ同學會」一眾成員，人人心懷不軌、身懷猜忌。但劉小麗竟以超進取突圍，唔理「曾被DQ難Cap水」，政綱都加入「漂白水」，結果成功爭取再被DQ。擅演老千嘅小麗老千，演技爛過爛蘋果，擸走「事後」，全城拍手。

　　最爆激情男 林卓廷

　　得獎感言：

　　輸畀陳浩天，我唔甘心！講奸戲，我應該贏！佢行運啫！明年我會更加努力，扮曬「廉記專家」呃上位，事帝，我攞硬！

　　正氣評語：

　　「一個林卓廷，新東冇得剩！」

　　能夠以一人之力，搞到59個黨友退黨，剷起成個新東支部咁滯，完全演活隻手遮天、毫無政治道德嘅霸氣。再睇埋班嬲嬲退黨人送上連串四字詞：雙重標準、態度專橫、黨同伐異、以權謀私、人格卑劣，林卓廷內心戲簡直無得揮！